ఆరంభశూరత్వం

ఈ తెలుగు బ్లాగ్ రాయటం మొదలుపెట్టాలనుకున్నప్పుడు పెద్ద పుడింగిలా అనుకున్నా, క్రమం తప్పకుండా ఇంగ్లీష్ బ్లాగ్ ఎలా రాస్తానో ఇదీ అలానే రాయాలని…కానీ ఒక 7-8 పోస్టులు రాసిన తర్వాత దీని ముఖం చూసిన పాపాన పోలేదు
ఇలా ఈ మధ్య కాలంలో నేను చాలా పనులు ఎంతో ఉత్సాహంగా మొదలు పెట్టడం, కొన్ని రోజుల్లో బోర్ కొట్టి వదిలెయ్యడం జరిగింది….మచ్చుక్కి కొన్ని చెప్తా,
1. ఎంబ్రాయిడరీ – ఆ మధ్య పెద్దికి ఒక చీర మీద కుందన్స్ కుట్టిచ్చా..ఆవిడేమో దాన్ని పొరుగింటి పుల్లమ్మ బాగుంది అనగానే దానం చేసేసింది…చేసిందే కాకుండా “మీరు తీసుకోండి పర్లేదు, మా కీర్తి ఎలానూ ఇంట్లో ఖాళీగా వుంది, నేను మరోటి కుట్టించుకుంటా” అని చెప్పిందిట…ఇక నాకు ఒళ్ళుమండి “ఛీ పో! నేనింక కుట్టను” అని చెప్పేసా…అంతే  ఆ పూసలు, దారాలు, సూదుల పెట్టె ఒక మూల పడిపోయింది
2. ఉన్ని స్వెట్టర్ – సినిమాలు చూసి చూసి ప్రెగ్నంట్ అయిన వాళ్ళంతా పుట్టబోయే పాపాయికి స్వెట్టర్లు, టోపీలు గట్రా కుడతారు కదా అని నేను కూడా నాకు, మా తోడి కోడలికి పుట్టబోయే పిల్లలకి స్వెట్టర్లు కుట్టిస్తా అని మా అత్తగారితో గొప్పగా చెప్పా…తీరా మొదలెడదామనుకునే అప్పటికి ఎవరో చెప్పారు “ఈ టైములో అలా ఎక్కువ సేపు కూర్చుంటే నడుం పట్టేస్తుంది” అని..అంతే ఆ మాటకి భయమేసి ఇక ఆ పని జోలికి పోలేదు…మా అత్తగారు ఇప్పటికీ వేళాకోళం చేస్తుంటారు “ఏం పాపా, స్వెట్టర్లు కుట్టేసావా, ఏ రంగువి” అని
3. తమిళ భాష నేర్చుకోవడం – తరచూ చెన్నై కి షాపింగ్ అనో, ఇతర పనులకో వెళ్తుంటాం కదా, వాళ్ళ భాష నేర్చుకుందాం అని పుస్తకాలు కొనుక్కొచ్చా..ఒక 4-5 రోజులు చాలా శ్రద్ధగా అమ్మ, ఆవు, ఇల్లు, ఈగ దాకా నేర్చేసుకుని ఆ తర్వాత బోర్ కొట్టి ఆ పుస్తకాలు ఎక్కడో దాచేసా…కళ్ళెదురుగా కనిపిస్తే గిల్టీ గా ఫీల్ అవుతానేమో అని 8)
4. ట్రాష్ టు ట్రెజర్ – మా ఇంట్లో వుండే చెత్త సామాన్లు మాత్రమే కాకుండా వాళ్ళింట్లో వీళ్ళింట్లో పనికిరాని వస్తువులని పోగేసి ఇంట్లో చేర్చా వాటితో ఏవేవో కళాఖండాలు చేయాలని…మొదలు పెట్టాక నా అయిడియాలు నాకే నచ్చక మధ్యలోనే  ఆపేసా…ఆ చెత్త సామాన్లు పారేస్తూ అమ్మ నా వైపు చూసిన చూపు ఈ జన్మలో మర్చిపోలేను
ఇలా చెప్తూ పోతే అంతే వుండదు..అదేంటో అసలేపని పూర్తి చెయ్యాలనిపించట్లేదు…ఎప్పుడూ అలా పడుకుని ఆలోచిస్తూ గడిపేస్తున్నా టైం అంతా….అదే బాగుంది నాకు…కాకపోతే ఏదో చేసెయ్యాలని ఆత్రం మాత్రం వుంది